SINTAMINA, CUCU TERTUA BODIL BANGGAL

Kak Sintamina, cucu pertama Bodil Banggal, dengan suaminya Rasyiman Saragih Sumbayak Pardalan Tapian. Berdiri disebelah kanan mereka adalah puterinya, Surenni. Di sebelah kirinya adalah Sarmedi (menggendong Rodearni) dan Mansen.

RIWAYAT HIDUP ni Inang SINTAMINA PURBA SIGUMONRONG

Ia Inang Nan-Surenni na margoran SINTAMINA PURBA SIGUMONRONG on, tubuh tanggal 31 Desember 1921 i huta Bawang, Sondi Raya, Kabupaten Simalungun, boru bungatubuh ni St. Tarianus Purba Sigumonrong pakon K. Dinaria br. Saragih Garingging.
Bapa ni in, ai ma anak sikahanan ni Oppung Mariam Purba Sigumonrong, Anakboru Raya, gamot ni Harajaon Raya ondi. Ai ma ase ia do pahompu sikahanan ni oppung ni in.
Ia inang ni in, ai ma boru ni Tuan Sumayan Saragih Garingging, na igoran Tuan Hapoltakan, na gabe Raja Raya, tinubuhkon ni Puang Payung. Ai ma ase panogolan ni Garingging Rumah Bolon do inang on.

Humbani 8 sidea na saamang-sainang, 2 do sidea naboru, 6 dalahi, ai ma: St. Saridin Purba ondi, Mennaria br. Purba, Saralen Purba ondi, Djawasman (Asang) Purba, Mansen Purba SH, Dr. Sarmedi Purba pakon Ned Riahman Purba. Na marsanina bapa pakon sidea in, ai ma St. Sudiman Purba na marsanina/marbotou, Haji Lesman Purba na marsanina/marbotou, Sarmauli appa Sarmenni Purba, pakon St. Sariaman Purba appa Santiaman Purba ondi. Humbani ganup sidea na saoppung (tolu iangtua) in, ia ma sikahanan.

Rap pakon Oppungni do inang on humbani etek-etekonnari das hu bani na marumur 10 tahun, ai ma Oppung Puang Payung nokkan, ase dong hasoman ni oppung ni in, ai boru sasada do inangni. Age pe rap pakon Oppung ni in ia, tapi lang ipamanja ia, gariada podah ni Oppung ia ma na bahat membentuk kepribadianni. I Tombak Sihala do oppung ni in marianan. Ai ma ase marsikolah hu Merek Raya do ia sapari.

Itoruskon do sikolahni hu Zending Meisyesvervolgschool (Sekolah Kepandaian Putri) i Pematang Siantar, tapi lang tammat. Sihol pe namin uhurni marsikolah, tapi sundat halani lang tarbalanjai namatorasni.

Dobni soppat do ia masuk hu Sekolah Perawat i Kabanjahe. Tapi ai pe lang homa boi torus, halani tutup do sekolah in pangkorhon ni na porang Bolanda pakon Jerman i Eropa (Perang Dunia II).

Sonai pe marusaha do ia torus ase boi horja i Rumah Sakit. Dobni, saud do ia horja i Rumah Sakit Perkebunan Rambutan, tapi lang homa dokah, ai bani parroh ni Jepang (Maret 1942), itangkapi ma Bulanda hun Rumah Sakit ai, sidea pe marharawa ma.
Sanggah na i Rumah Sakit Rambutan in ma ia, hotop do roh Rasyiman Saragih ondi manrohisi. Sonai ma age sanggah parroh ni Jepang, Rasyiman Saragih ondi do manrohi sidea hu parharawaan, lanjar hunjai ma sidea rap pakon sadanari anakboru hasomanni bohat mardalan nahei mulak hu Raya, mamontas hun Raya Kahean.

Sanggah parroh ni Jepang ia ma domu riah ni sidea pakon Rasyiman Saragih ondi martongahjabu. Ihadearhon namataros ma homa riah ni sidea in. Manjalo pasu-pasu partongahjabuon ma sidea bani ari 19 Juli 1942, nanipadas ni Pdt. J. Wismar Saragih ondi.

Ia Rasyiman Saragih, paramangon ni in, ai ma anak sikahanan niombah ni Jori Saragih Sumbayak, anak ni Pardalan Tapian, gamot ni Harajaon Raya. Panogolan ni Purba Sidadolog do paramangon ni in. Tapi halani manipat do martondong-manakboru Pardalan Tapian pakon Sigumonrong, gabe hataonkon do na mangulaki do partongahjabuon ni sidea in.

Sanggah garama pe domma horja hinan paramangon ni in i Dinas Pertanian i Pematang Siantar. Ai ma ase dob marhajabuan sidea, marianan i Pematang Siantar do sidea, mula-mula i Jl. Gereja, dob ai i Pamatang.

Tahun 1948 pindah ma sidea hu Tanjung Balai. Dob ai use ipindahkon ma hu Dinas Pertanian Sumatera Utara, Medan.

Halani parngitni pargoluhon sanggah Jepang, dihut do inang on mansari. Idingat do tong podah ni Oppungni: “lang boratan tanoh in panuanannima”. Na mararti do ai: jangan malas bekerja. Ai ma ase sadokah goluhni lalab do ia horja-horja: usaha jahit-menjahit, mambaen pakean siap jual – konveksi (sanggah zaman Jepang, sonai sanggah do i Medan); sanggah i Tanjung Balei, soppat do lobei horja ia i Rumah Sakit (1949-1950); dob i Medan, ongga do ia gabe Pegawai (Juru Tik) i Kantor Gubernur Sumatera Utara (1952-1959); dob ai mambantu Usaha Percetakan.

Dihut ma gakni deba ai halani rasa tanggungjawabni na songon sikahanan – ai haduasi do sidea sikahanan. Ai ma ase pagattih soluk do anggi ni suami-isteri in tondok i rumah ni sidea, dong ma deba anggi ni sidea in na gabe Asisten i Perkebunan, dong na jadi SH, dong na jadi Dokter. Dos do homa pansarihon ni sidea hu bani anggi ni sidea in akkup lopah.

Sobali manjuljul anggini marsikolah bei, ia sandiri pe iporluhon do marlajar, tarlobih ma ai pasal Hata ni Naibata. Ai ma ase idihuti do Sekolah Alkitab Malam: Program Sertipikat (D1) Teologia (tahun 1987-1990).

Aktip do homa ia bani organisasi na bersifat kerohanian: Setia Usaha Humpulan Parinangon HKBP Simalungun (1953-1959); Ketua Wanita GKPS se Kota Medan (1960-1967); Ketua Wanita GKPS Distrik III (1967-1970); Ketua Wanita GKPS Hang Tuah (1972-1976); Pengurus Dana Sosial Wanita GKPS Hang Tuah (1977-1990); humbani tahun 1954 dihut do ia bani kegiatan PWKI Sumatera Utara, anjaha 1963-1965 gabe Anggota DPD PWKI.

Sanggah i Pamatang sidea (Tahun 1943) tubuh boru bungatubuhni, ai ma Surenni br. Saragih Sumbayak. In do hansa tinubuhkonni.

Dob marumur boru sasada in 15 tahun, tubuh ma sura-sura ni paramangonni ase mangain anak na tading maetek hun Jawatan Sosial. Tapi, dob ipatangi pandapot ni diha-diha, dobni ibalosi ma sura-sura ni paramangon ni in, ai ma marhitei napagodangkon sada niombah ni sanina-sapanganonkonni (paribanni), ai ma boru (niombah palimahon) ni Jawalim Saragih (ondi), tinubuhkon ni Mennaria Purba, anggini, ai ma tahun 1959. Ai ma na margoran si Rodearni (ondi).

Dob ai, ase dong naipagodang humbani saninani, ialop ma anak dalahi (niombah paopatkon) ni Lesman Saragih, anggini, ai ma tahun 1960. Ai ma na margoran Luther Suradear.

Ai ma ase tolu do niombah hataonkon niombah ni inang on. Hatolusi domma marhajabuan bei:
• Surenni marhajabuan pakon Ir. A. Oscar Sipayung hun Bangun Purba, panogolan ni Purba Pakpak. Humbani sidea in, lima pahoppuni, 4 ma ai naboru, 1 dalahi (siditongah). Humbani na lima pahoppu in, domma 3 na dob marhundulan. Humbani pahoppu sikahanan, ai ma na margoran Imelda br. Sipayung, na laho hu bani H. Harianja, dua ma nono-ni, ai ma Daniel Hada Harianja pakon Timothy Hada Harianja.
• Rodearni (ondi) marhajabuan pakon Jahamen Purba Pakpak, panogolan ni Saragih Garingging, hun Gunung Huluan Raya. Humbani sidea in, dua pahoppu, dalahi haduasi.
• Drs. Luther Suradear marhajabuan pakon Herlina br. Purba, BSc., panogolan ni Simorangkir, hun huta Dolok Sanggul. Humbani sidea in, dua pahoppuni, dalahi haduasi.
Ai ma ase bani parujung ni goluhni, tinadingni inang on ai ma dua niombah (halani sada domma parlobei marujung goluh, ai ma Rodearni), dua hela, sada parumaen, 9 pahoppu, 2 nono, ganup16.

Anggo paramangonni domma parlobei marujung goluh, ai ma tahun 1998 ondi.

Soppong do boritan inang on, ai ma na ari Kamis tanggal 26 September ondi. Tapi hunjia nari lang be tarparsahapkon, halani stroke berat. Paonom arihon i Rumah Sakit Elisabeth, marujung ma goluhni ari Selasa, tanggal 1 Oktober 2002 ondi, pukul 13.30, dob marumur 80 tahun 10 bulan.

Sonai ma riwayat hidup singkat ni inang SINTAMINA PURBA SIGUMONRONG on, na boi ikutip hanami humbani na sinuratkonni sandiri tanggal 24 Juni 2002 ondi.