Selasa, 10 Februari 2009

SIGUMONRONG PAR HUTA JA DO HAM

(na binatur ni Mansen Purba SH)

Isuratkon Tulang Taralamsyah Garingging ondi do bani buku ‘Saragih Garingging’ ia Sigumonrong na rap roh do in hu Raya pakon Saragih Garingging bani bona ni abad 15 (tahun 1400-an). Nini sonon:”Puar ma isini Ajinembah. Sanggah ijia ma si Pinangsori na marmahan horbou Sinanggalutu pakon horbou na legannari i Garingging luppat dompak kehen ni Ajinembah mangindahi ianan parhutaan rap pakon piga-piga saninani na sada uhur, sonai appa gamot-gamotni.; Marodoran ma sidea hira-hira lobih saratus halak, mamboan horbou, sirsir bohal itongah dalan. Borhat ma sidea hun Garingging hira-hira bani tahun 1427, hu Tikkos, sambil manuluihon hade-hade na ra dihut bani odoran on. Dihut ma hunjai na marmorga Sigumonrong deba. Ipatorus sidea mardalan hu Purba Tua, dong homa hunjai na mangihutkon sidea. Ipatorus sidea hu Hinalang, ijai pe dong do na mangihutkon, ai ma na marmorga Sitopu” 1).

Hira panrippunan ni sipanurat ma in, dob ipatumpu tuturian pasal morga Garingging, itulimati marhitei na mambasa buku-buku sejarah ni Indonesia, Aceh, Padri, pakon na legan.

Hira marsijaloan do hatorangan ni Tulang Taralamsyah Garingging in pakon pangakuan ni buei na marmorga Sigumonrong. Ai sanggah goluh ni Bapanami ondi , ringgas do ia manungkun-nungkun pasal Sigumonrong. Nini, hira ganup do mangaku ia bona ni Sigumonrong ai ma hun Tikkos. Pori dong na mangkatahon bani, ia Purba (dihut ma ijai Purba Sigumonrong) marbona hun Simamora i Toba, jungil do ia mambalosi:”Nini nasiam (Toba) do sonai. Tapi anggo Sigumonrong marbona hun Tikkos (atap Cingkes) do.”

Anggo Abang Tuan Bandar Alam (TBA) Purba Tambak ondi mangkatahon, pori na ibahen ondi tarombo na marbona mardakkah marranting, marbona humbani Purba Tambak do gan Purba Sigumonrong. Isuratkon do sonai bani buku sejarah ni Purba Tambak. Dob hubasa bukuni on ijia, tudu ma dong panorang marbual-buali pakon Abang TBA on sanggah pajumpah hanami i Museum Simalungun Pematang Siantar.

Huhuria-huriahon ma ijia manungkun:”Anggo hun Pagarruyung do ningon nasiam Purba Tambak, ai dong do Purba Tambak i Pagarruyung?”

Balosni:”Lang. Dob ijon (i Tambak Bawang) pe hanami ase Purba Tambak.”

Roh ma ningku use:”Anggo sonai, ai lang ra do domma dong hinan ijon na marmorga Purba, gabe ai parihutonkon nasiam mambahen morga Purba nasiam?”

Nini ma mambalosi:”Ra do homa sonai.”

Ai samah sibotoh adat Simalungun do hanami, Hira dos pambotohnami na maningon tiba Anakborujabu ni parboru do paranak roh pajabu parsahapan, sonai age sanggah maralop. Anggo sedo na marmorga hinan, boi do morga ni Anakborujabu on parihuthononni lanjar na gabe morgani, dob ipadalan demban parhombaran.

Jadi ningku ma use dompak Abang TBA Purba Tambak on irik hutawahon:”Anggo sonai, atap hanami Purba Sigumonrong do parihutonkon nasiam ai. Ai lang dong huta atap nagori na legan harohan ni Purba Sigumonrong sobali Tikkos. Jadi domma marhuta i Tikkos Purba Sigumonrong tingki parroh nasiam ai hun Pagarruyung”

“Eak. Ra do homa sonai,” nini ma irik itawahon, gabe tartawai hanami pakon piga-piga hasoman na marbuali on.

Age pe itawahon hanami parbualan on, boi do dong sintong ni in. Anggo tongon do nahinatahon ni Tulang Taralamsyah, tahun 1400-an do roh Sigumonrong hu Raya, tar 200 tahun dobsi ai pe ase roh par Pagarruyung hu Tambak Bawang. Ai nini Abang TBA Purba Tambak do bani buku ni ai, tar hira-hira tahun 1600-an do parroh ni sidea ai hun Pagarruyung. Lang piga dokah dob das ijon, iboruhon Raja Nagur ma nalobei ni Purba Tambak on. Ai ma deba dalanni parjongjong ni Kerajaan Silou. Ipudian ni ari pabolah Kerajaan Silou. Dob ai jongjong ma Kerajaan Dolog Silou. Nahatahon tahun 1600-an, ai sanggah panorang ni Putri Hijau (i Deli Tua?).do nini parjongjong ni Kerajaan Silou.

Sanggah panorang ni Tuan Raya Na Mabajan (ai ma tar hira-hira tahun 1880-an), huta na banggal do gan Tikkos on i jajahan ni Harajaon Dolog Silou, na balog pakon Karo. Sanggah masa mussuh pabolah i Tikkos pakon talun na i pabalog pakon Tikkos, jajahan ni Dolog Silou in, ipindo sin Dolog ma ase dihut Raya bastu. Saud do isuruh Raya bala laho mangurupi Tikkos. Age pe bani mungkahni muntul do piga-piga hali bala ni sin Raya, dobni saud do talu ibahen sin Raya mussuh in. Tapi saborngin do hassa huta na ialah on i iankon sidea. Ai sonin roh Karo mangurupi, maporus ma bala ni sin Raya, mulak hu Paribuan.

Nini Abang Saridin ondi, dong do i huta Tikkos in Rumah Anjung-anjung ni Tarigan Gerneng, ai ma Purba Sigumonrong. Ai anggo halak Karo ia, Tarigan Gerneng do ibahen goran ni morgani. Anggo halak Simalungun ia, Purba Sigumonrong. Marsiakuan do na dos do in. Samah marbona hun Tikkos, atap Cingkes (nini halak Karo). Anggo i huta Tikkos in, age Tarigan Gerneng nini morgani, marsahap Simalungun do ia anggo roh na marmorga Purba Sigumonrong. Sonai do homa na marmorga Sigumonrong, ipala-palai do marsahap Karo anggo roh na marmorga Tarigan Gerneng. Tarlobih sidea na dob marhuta i Saribudolok, songon Bapa Targer ondi, sipata marsahap Karo, sipata marsahap Simalungun.

Lanjar sadalan hujin ma mambahen lang ongga tarjalo uhurhu na sisada hasusuran hinan do ganup Purba. Ai hira marsigoran huta harohon ni bei do Purba na i Simalungun. Purba Tambak manghatahon hun Pagarryung do asal ni sidea. Purba Pakpak manghatahon hun Pakpak Dairi do asal ni sidea. Purba Sigumonrong manghatahon hun Tikkos (Cingkes) do harohanni sidea.

Ai ma ase ongga do husuratkon 2), ia morga i Simalungun ai ma goranan ni pengelompokan ibagas loulouan maujana (=masyarakat), sedo goran ni sidada hasusuran songon bani sidea halak Toba. Paling ma na boi hatahonon sisada hasusuran ai ma samah Purba Sigumonrong, samah Purba Pakpak, samah Saragih Garingging. Gari ai, lalab do sangsi ahu, hira na so tarjalo uhur do sisada hasusuran Saragih Sumbayak. Ai i Harajaon Raya, opat do goranan ni Gamot Harajaon. Tolu ma ai Saragih Sumbayak (ai ma Sumbayak Rumah Tongah, Sumbayak Parhuluan, Sumbayak Pardalan Tapian), sada do hansa na so Saragih Sumbayak (ai ma Purba Sigumonrong). Sobali Gamot in, Saragih Sumbayak (Ratongah) do na i goran ‘bona ni adat’. Ai sidea ma tong manjolom horja mamolon (pabangkitkon Raja atap Puang Bolon). Saragih Sumbayak (Rabayu) do homa naginoran sonari on eksekutor anggo domma idabuh uhum na maningon matei do (pidana mati). Ai ma ase dong gan ‘nangka pamunuhan” i Rabayu. Hira Sumbayak do panriahonkon anggo jumpah ma panorangni pabangkitkon Raja mangihutkon adat. Anggo tongon do na marsanina sidea samah Sumbayak, mase ma sai Garingging do lalab na ibolonkon gabe Raja. Sedo Sumbayak.

Dob marsijaloan na marbona hun Tikkos do ganup samah Sigumonrong, marsisungkunan ma use atap par ja, atap par huta ja, Sigumonrong ni on. Ai hutani do na somal isungkun halak lobei, sedo morgani (songon halak Toba). In homa, hira lang ipaanu-anu halak gakni sapari atap ginoppar ni Oppung hunja ia. Gariada anggo sapari lang piga na mambotoh bona susurni lobih humbani Bapa ni Oppungni. Songon Bapanami ondi ma pori, niombah sikahanan ni Anakboru Raya (ai ma sada humbani opat Gamot ni Harajaon Raya) ma ia, sibar goran ni Oppung ni do hansa ibotoh tangkas, ai ma na margoran Jorbaik. Hubabouhon ni ai, mar-‘gan’ mando ia, ‘sonai gan nini halak’. Age Mangkela Pam-Bungaran (Saragih Garingging) ondi, pitah goran ni Oppungni do hansa isuratkon bani Buku Harian partingkianni. Talup-talup lang ibotoh be ise goran ni Oppung ni Bapani.

Songon hanami ma pori, anggo isungkun halak Sigumonrong par ja, balos nami: Sigumonrong hun Partayuban, halani i Partayuban hinan manombei huta Oppung ondi. Atap ihatahon hanami Sigumonrong Pamatang Raya, halani i Pamatang (ni Kerajaan Raya) do sapari rumah ni Oppung ondi, ai Gamot (Anakboru Raya) ni Harajaon Raya do jabatanni. Ronsi nuan dong pe rumahnami i Pamatang, ai ma na niiankon ni Bapa Pan Lesman ondi, ai ia do manjolom jabatan Anakboru Raya songgah dong ni Harajaon ondi. Paima ai hu Pamatang Raya, lang nabotoh be hun huta ja hinan, sobali hun Tikkos.

Songon Sigumonrong par Sirpang Daligraya ma pori, sonai Sigumonrong par Rar Rayabayu. Ganup do mambotoh na Sigumonrong hun Rayapanribuan do sidea. Na marnunut do sidea pindah, gakni ase roh dohorni hu pasar (dalan banggal, jalan raya).

Tarsonai do gan age Sigumonrong Mappu. Age pe domma dokah sidea i Mappu, ibotoh sidea do na par Dologhasian hinan do nalobei ni sidea.

Sigumonrong par Marubun Lokkung pe bahat do sidea na marhatongonkon na roh (missah) hun Lokkung do sidea. Anggo na pahombar in pakon na isuratkon ni Pdt. J. Wismar Saragih na dob tinarsingata nongkan, hira tarjalo uhur do. Ai ongga do Lokkung iporang Raya sanggah panorang ni Tuan Raya Na Mabajan. Dokah do maruttol porang ia. Dob ni talu ma do Lokkung on. Itombei Tuan Raya Na Mabajan ma huta Daligraya donokkon Lokkung. Gakni ijia ma parluppat ni par Lokkung hu talun ni Kerajaan Dolog Silou na padipar pakon Nagoridolok. Ai ma gakni mambahen na ibahen goran ni huta in Marubun Lokkung. Humbani sapari sai Sigumonrong do tong Pangulu i Marubun Lokkung. Pori pe mosor hu bani morga na legan, panorang parpudi on do ai masa.

Sanggah marhuta ahu i Siantar, ongga do homa pajumpah ahu pakon Sigumonrong na dob marhuta homa i Siantar. Nini, Sigumonrong par Parbutaran na do ia. Ia sidea in gan par Marubun Lokkung hinan do na lopus hu Parbutaran. Sidea in pe hira Pangulu do tong i huta Parbutaran in.

Dob humbuei Sigumonrong marhuta i Medan, hira huta harohan ni ondi do ibahen sidea bei dalan parsaoranni. Ai ma ase hira saor do i Medan on sidea samah Sigumonrong Marubun Lokkung. Sonai do homa age parhuta na legannari ai.
Pori nagorani Sigumonrong in mangihutkon goran ni huta, ra dong do gunani. Hinaotikni hunjai ma use boi iparpadomu anggo na dos do huta bonasusurni. Pori palegan-legan pe goranan in, sada do anggo huta bona susur ni Sigumonrong, ai ma Tikkos (Cingkes). Talup-talup hunjin ma marnunut roh hu Raya sonai age hu huta na legannari ai.

Ijon na lajou do nasuratkon panggoranion ni Sigumonrong marihutkon huta. Silape-lape ni pe na husuratkon, ai asal tudu na dingat do hansa, lape pangkei natulimati. Gendo dong pamungkahni, pori dong humbani hita Sigumonrong na sihol patangkashon in.

Tar sonon ma panggoranion ni Sigumonrong marihutkon huta:
1. Sigumonrong Tikkos (Cingkes)
2. Sigumonrong Pamatang Raya/Partayuban
3. Sigumonrong Ratongah
4. Sigumonrong Sinondang
5. Sigumonrong Rayapanribuan
6. Sigumonrong Rayabayu
7. Sigumonrong Sirpang Daligraya
8. Sigumonrong Dologhasian
9. Sigumonrong Mappu
10. Sigumonrong Nagatongah
11. Sigumonrong Bawang
12. Sigumonrong Bahapal
13. Sigumonrong Bah Bolon
14. Sigumonrong Lokkung
15. Sigumonrong Marubun Lokkung
16. Sigumonrong Parbutaran
17. Sigumonrong Sindaraya
18. Sigumonrong Pispis
19. Sigumonrong Nagoridolok
20. .................(pnl)..................

Lape nabotoh atap na porlu pe dong goranan marihutkon huta in. Hassa, sanggah horja sayur matua ni Mangkela Pam-Bungaran bani bulan Desember 2008 ondi, goranan marihutkon huta in do nabahen ase nabotoh parhundul ni samah Sigumonrong bani horja adat in. Ai Sigumonrong do manipat tondong ni nasi Mangkela ondi. Pori idilo Tondong Mataniari nidokan, das hu bani Tondong Pamupus, Tondong Jabu, Tondong Marihutkon Niombah, ronsi Tondong Marihutkon Pahoppu, Sigumonrong do ganup. Goran ni huta sapariondi ma hansa na palegankon Tondong na sada pakon Tondong na sadanari.. Halani ai dos riah ijia ase goranan ni Tondong Sigumonrong marihutkon huta ma idilohon. Janah, ase sahali hat ma parroh ni ganup Tondong in mangiligi. Ai pori sada-sada pe mangiligi, marsiarahan do. Hansi pe rap parrohni, anggo demban pangalo-aloonkon ni suhut, sada bei ma Tondong in. Ai ma ase dong ma ai demban hu bani Sigumonrong Dologhasian (ai sidea ma Tondong Pamupus, sidea do homa Tondong Bona pakon Tondong Mataniari). Age pe Sigumonrong Dologhasian goranni, anggo na roh sanggah horja in ai ma na dob marhuta i Siantar pakon i Medan do. Dob ai demban hu bani Sigumonrong Ratongah (Tondong Jabu ni Mangkela ondi). Dong ma in na roh hun Raya, dong par Siantar, dong par Medan. Dob ai hu bani Sigumonrong Partayuban (Tondong marihutkon niombah, Berlian). Na roh sanggah horja in ai ma na marhuta sonari i Siantar pakon na i Medan. Dong ma homa demban hu bani Sigumonrong Rayapanribuan (Tondong marihutkon Pahoppu, Benli). Age pe domma marhuta i Sondiraya Tondong Marihutkon Pahoppu on, igorankon ma tong huta sapariondi, Rayapanribuan. Sonai ma homa dob mulak hun panimbunan, rap roh do Tondong in, marsisurdukkon indahan pangari-ari ni bei.

Hunjin ma taridah, hassi pe sada do Sigumonrong, tapi parhundul (partongahjabuon) do parihutonkon bani lahoan adat. Sedo parmorgaon. Ai age pe samah Sigumonrong, ra do bani horja adat, na sada huppit luluan, na sadanari huppit talaga.

Nai ma ijia sanggah marujung goluh Lawei Pan Robin par Jl Cahaya, hinabaluhon ni Botou boru Sigumonrong Bahapal. Age pe Sigumonrong (Bahapal) do Tondong, tong do Sigumonrong (Mappu) na gabe Boru bani horja in, ai Tondong ni Sigumonrong Mappu do Lawei ondi).

Halani ai, pori pe nitta sada (marhasadaon) do samah Sigumonrong, ipajongjong hita homa Tuppuan Sigumonrong (pakon Boru appa Panogolan), anggo bani horja adat marsibuat hundulan ni bei do ai romban hu bani parhundul (partongahjabuon) ni bei.

Catatam:
1) Halaman 5 buku Saragih Garingging binarur ni Taralamsyah Garingging, nikaluarhon ni Mansen Purba SH, Medan; 1981. Tang tinuju ni buku on, ai ma manikkihon tarombo ni Saragih Garingging, ginoppar ni Sipinangsori par Garingging, na bukkas hun Ajinembah, laho hu Raya Simbolon. Susur hunjin ma Raja na hundul i hotak Harajaon Raya.
2) Aha do morga, Majalah Ambilan pakon Barita nakinalurahon ni GKPS. Husimpan anjaha hu-publish homa i blog LOPOU (http://mansenpurba.blogspot.com)