Jumat, 31 Oktober 2008

Barita ni Inang Dongmauhur br Haloho

Ibasahon sanggah Horja Sayur Matua ni Inang in i Sondiraya ari 28 Oktober 2008

Inang on tubuh bani bulan onom, tahun 1917 i huta Manak Raya. Tapi halani lang jelas pasal tanggalni, itotaphon pamarentah ma tanggal lahir ni 31 Desember 1917. Inang on ai ma niombahni bapa Ramajam Haloho, tinubuhkon ni inang Mudanim br Purba Pakpak. Inang on tubuh bani sada ‘keluarga besar’. Adong do sappuluh waluh (18) halak sidea na sabapa. Humbani na-18 halak ai, sadari on, dong ope sada nari na manggoluh, ai ma Tulang Jaripin Haloho.

Bani sada panorang ibagas tahun 1935, tikki mardalani inang on hu Tiga Raya, pajumpah ma ia pakon sada garama, ai ma Bapa Lamat Marludikan Purba Sigumongrong (LMP). Janah i bagas tahun ai homa, marhajabuan ma sidea. Bani panorang ai, marumur ma inang on 18 tahun.

Dob hossi marhajabuan ia, dokah ope inang on ase dapotan tuah. Halani ai, pitu tahun dob hossi marhajabuan sidea, aima bani tahun 1942, iondoshon sananini sidea ma, aima St. Tarianus Purba Sigumonrong, sada anak dalahi hun tongah-tongah keluargani, aima namargoran Riahman Purba Sigumonrong, gabe anakni. Gabe on ma anakni sikahanan, anak penggorananni: Nan Riahman. Waluh tahun dob ai, bani tahun 1950, tubuhan boru ma ia, ai ma na margoran Sarmauli br Sigumonrong. On ma niombah sipahi dua, janah boru sikahanan. Holang lima tahun homa, dapotan pasu-pasu do inang on use tahun 1955, marhitehon ni tubuhan boru, ai ma na margoran Sarmenni br Sigumonrong. Bani tahun 1977, iboruhon sidea ma use parmaenni botouni, aima parrumahni Jupin Saragih Sumbayak, na margoran Rosma br Sigumonrong.

Anggo baru-baru das inang on i Partayuban, marjuma do lobei horjani. Dob hossi ai, hira-hira tahun 1947-1948, ibuka sidea ma sada kodei kelontong i Sondi Raya, janah marjualan ma ia.

Mabalu ma inang on bani ari 10 Nopember tahun 1979. Itorushon do horjani na markodei ai das hubani tahun 1995. Dob hossi ai, marhorja pe use ia hu juma otik-otik rossi tahun 2001.

Salpu ai, halani moru ma gogohni, janah lang boi be ia marhorja, i Siantar ma ia rap pakon anakni: Riahman Purba. Hunjia nari, lambin-lambin moru ma gogohni. Age pe bahat moru gogohni halani umur, tapi anggo pardingatni lang ongga moru. Tongtong do torang pardingatni bani anak, boru, pakon pahoppuni: aima artani siharganan, sonai age bani haganup sinhutani. Sadokah 5 tahun ia soh i Siantar, lang ongga lupa ia manukkun kabar ni huta on.

Halani bujurni inang on, dokah do ia manggoluh bani tanoh na binere ni Naibata hubani. Maranak marboru, marpahoppu, janah marnono pakon marnini. Pahoppuni inang on dong do sapuluh halak. Pahoppu humbani anak dong tolu naboru, aima na margoran:
1. Ned Evelyn Kartika Purba (marhajabuan pakon Marco Dadi).
2. Ned Dewi Riahnami Purba (marhajabuan pakon Rudolf Benyamin Barus).
3. Ned Dina Anggraeni Purba

Humbani pahoppu on dong do use dua nono ai ma na margoran Ned Dean pakon Ned Christoper.

Pahoppu humbani boru dong 7 halak. Dua ma ai dalahi, janah lima boru. Aima na margoran:
1. Benly Pandi Saragih Garingging (marhajabuan pakon Ertiana br Sigumonrong)
2. Wendy Scottiana Saragih Garingging (marhajabuan pakon David Purba Dasuha).
3. Widya Ariesanni Saragih Garingging.
4. Daniel Naniou Damanik.
5. Ivana Rida Damanik (marhajabuan pakon Daniel Sinaga).
6. Imely Parmenisia Damanik.
7. Katherina Ezra Damanik.

Humbani pahoppu on, dong do ope 4 nini, ai ma na margoran:
1. Austin Beinberyl Saragih Garingging
2. Calvin Bryan Saragih Garingging
3. Angelina Sinaga.
4. Daviona Purba Dasuha.

Hira-hira mamungkah humbani 12 bulan na salpu, boi tarhatahon pitah i podoman mando inang on. Dob ai, dua minggu na salpu, mangindo mulak ma ia hu Sondi Raya. Na ari Jumat tanggal 17 bulan on, das ma inang on mulak hu Sondi Raya. Saminggu dokahni dob das ia ijon, bani ari Sabtu tanggal 25 Oktober 2008, pukul 08:30, marujung goluh ma inang on i bagas tonggo.

Inang na dear,
Seng ongga manggila ibagas sogam,
Boi sengeh mambere podah padearhon parlahouni niombah na so sintong,
Lamlam janah pintor maruhur,
Lang soya ibahen goranni Dongmauhur br Haloho.

Sondi Raya, 27 Oktober 2008